భార్యపై కోపం.. అత్తను హెల్మెట్‌తో కొట్టి చంపిన కిరాతక అల్లుడు!

భార్యపై ఉన్న కోపాన్ని అత్తపై ప్రదర్శించి, ఆమె ప్రాణాలు తీశాడో కిరాతక అల్లుడు. ప్రమాదవశాత్తు కిందపడి చనిపోయిందని అందరినీ నమ్మించాలని చూసినా, చివరకు సీసీ కెమెరా ఫుటేజ్ రూపంలో నిజం నిగ్గుతేలింది. ఈ దారుణ ఘటన మేడ్చల్ జిల్లా చెంగిచర్లలో చోటుచేసుకుంది.

అస‌లేం జ‌రిగిందంటే..! 
చెంగిచర్ల ఆర్టీసీ కాలనీకి చెందిన కొల్ల అరుణ (39)కు ఇద్దరు కుమార్తెలు. ఆమె చిన్న కుమార్తె కావ్య (19), కరీంనగర్‌కు చెందిన కర్రు స్నేహిత్ (28)ను గతేడాది ప్రేమ వివాహం చేసుకుంది. అయితే, కొంతకాలంగా వారిద్దరి మధ్య మనస్పర్థలు తలెత్తాయి. ఈ క్రమంలోనే గత నెల 29న రాత్రి స్నేహిత్ అత్త అరుణకు ఫోన్ చేసి, "నేనొక పెద్ద కంపెనీలో ఆఫీసర్‌ని. మీ కూతుర్ని పెళ్లి చేసుకున్నాను. కానీ, తను చిన్న విషయాలకే గొడవపడుతోంది" అంటూ తీవ్ర స్వరంతో మాట్లాడాడు. ఈ సందర్భంగా ఇద్దరి మధ్య వాగ్వాదం జరిగింది.

ఈ ఘటన జరిగిన మరుసటి రోజు (ఏప్రిల్ 30) మధ్యాహ్నం, దుకాణానికి వెళ్లి వస్తున్న అరుణను స్నేహిత్ తన బైక్‌పై ఎక్కించుకున్నాడు. మార్గమధ్యంలో చెంగిచర్లలోని హనుమాన్ ఆలయం సమీపంలో బైక్ ఆపి ఆమెతో గొడవపడ్డాడు. మాటామాటా పెరగడంతో ఆగ్రహంతో ఊగిపోయిన స్నేహిత్, తన హెల్మెట్‌తో అరుణ తలపై బలంగా కొట్టాడు. ఆ దెబ్బకు ఆమె బైక్‌పై నుంచి కిందపడి తీవ్రంగా గాయపడింది.

వెంటనే అతను తన భార్య కావ్యకు ఫోన్ చేసి, "అత్తమ్మకు ఫిట్స్ వచ్చి బండి మీద నుంచి కిందపడిపోయింది. ఆసుపత్రికి తీసుకెళుతున్నాను" అని కట్టుకథ అల్లాడు. హుటాహుటిన ఆసుపత్రికి చేరుకున్న కావ్య, చికిత్స పొందుతూ తల్లి అరుణ మరణించడంతో కన్నీరుమున్నీరైంది. అయితే, భర్త ప్రవర్తనపై అనుమానం రావడంతో ఘటన జరిగిన ప్రాంతంలోని సీసీ కెమెరాలను పరిశీలించింది. ఆ ఫుటేజ్‌లో స్నేహిత్ తన తల్లిని హెల్మెట్‌తో కొట్టడం స్పష్టంగా రికార్డవడంతో ఆమె దిగ్భ్రాంతికి గురైంది.

తన తల్లి మృతికి భర్తే కారణమని నిర్ధారించుకున్న కావ్య, పోలీసులకు ఫిర్యాదు చేసింది. ఈ మేరకు కేసు నమోదు చేసుకున్న పోలీసులు దర్యాప్తు చేపట్టారు. అత్తను హత్య చేసిన ఈ దారుణానికి సంబంధించిన సీసీ ఫుటేజ్ ప్రస్తుతం సోషల్ మీడియాలో వైరల్‌గా మారింది.